爛仔波打謝技術流 撐史篤城主場爆廠
2012/08/26
阿仙奴開季第2輪就要面對厭惡賽程，今晚喺英超早場作客剋星史篤城，「兵工廠」眾星每次對親史篤城都畀人踢到飛起，今季連中場悍將桑治都走埋，中場肯定完全唔夠搶，讓波必反，要「讓球主勝」！

作客受壓 讓波高危
正所謂一物治一物，阿仙奴招牌短傳入滲出名好睇，但當遇上硬橋硬馬，擅踢爛仔波嘅史篤城，「技術流」即時變成花拳繡腿。「兵工廠」喺主場對史篤城尚可控制戰局，但作客就會陷入困局，佢哋中前場球員會畀人踢到慌失失，後防又不斷受壓，根本無法施展華麗足球。

阿仙奴賣走王牌射手尹佩斯，開咧戰狂攻新特蘭只能互交白卷，新箭頭普多斯基同基奧特輪住失機，一時三刻未接到班，另一新兵辛迪卡索拉人仔細細，踢法好精，畀波尺寸好，但今次實畀史篤城班大舊佬撞散，「兵工廠」為錢放走埋防中桑治，依家要靠戴亞比同阿迪達等同人搶中場，咁嘅形勢仲要讓波認真唔合理。

高空轟炸 死球搵到食
史篤城冇乜過人之處，但勝在踢法簡單直接有效率，吓吓高Q大棍轟埋去，每次死球都係入波機會，中鋒高治、一對中堅賀夫同梳爾哥斯都係好頂得嘅高佬，阿仙奴防線靠一個梅迪薩卡點頂得住？翻查往績，史篤城近5次主場對阿仙奴錄得3勝1和1負，完全唔赦「兵工廠」，受讓必捧，進取博埋主W都仲得。