佐藤壽人大把表演機會

主人家廣島三箭喺日職搏足成季，難免會有疲態，上場資格賽佢哋對住大洋洲冠軍奧克蘭睇住食，最終小勝一粒，班波全場控制戰局，表現都幾對辦，贏來耗力唔多。

三箭反擊效率好高，上場面對奧克蘭龜縮踢法發揮唔到最強威力，艾阿里掛住非洲冠軍牌頭唔會死守，預期三箭射手佐藤壽人會有更多空間同入波機會，可望回復日職射手王本色助球隊贏波晉級，有主場之利加上對手冇態，三箭只係讓平半絕對係蘇豪心水。

三箭讓平半起筷

日職冠軍隊廣島三箭於世冠盃再度主場出擊，今次會喺豐田球場決戰非洲冠軍艾阿里，埃及勁旅艾阿里年初經歷球迷騷亂慘劇元氣大傷，當地聯賽仲未踢番，雖然佢哋能夠成為非洲冠軍出戰世冠盃，但計比賽狀態始終唔及對手，三箭小讓平半蘇豪要上盤！

艾阿里年初發生球迷騷亂導致逾七十人死亡，屬於本年度球壇其中一個黑暗日子，當地足總至今仲未批准新季聯賽開波，艾阿里將士繼續努力操練，上月成功喺非冠聯奪標，並將冠軍獻畀死難球迷，今次代表非洲出戰世冠盃，決心喺世界舞台再創佳績。不過，佢哋上次比賽已經係十一月十八日，距今已有三周，班兵抖得太耐缺乏比賽狀態，恐怕有心無力。