上个礼拜英超开锣，曼市双雄、车路士、热刺同利物浦都顺利赢波，赖低阿仙奴喺主场以1:3大败畀阿士东维拉，睇嚟云格真係要快啲出手买人先掂喇!今晚14支英超球队继续捉对厮杀，小妹认为暂列榜尾嘅纽卡素迎战韦斯咸呢场波最好路，相信「喜鹊」即使有主场之利仍难逃一败，不妨进取啲博埋3.25倍客W!

　　「喜鹊」喺首战惨吞曼城4蛋，表现令支持者相当失望!先讲进攻，被球迷寄予厚望嘅柏比斯施斯同宾艾化，全场都好似隐咗形咁，虽然史提芬泰莱喺上半场尾段，向阿古路开肘被逐係大败关键，但纽卡素反击乏力，几乎连射门都冇，先至係最攞胆嘅原因。

　　高队长Hea踢 纽记防线危

　　讲到纽记嘅防线，更加可以用恐怖嚟形容。特别係主力兼队长高洛仙尼，上仗佢无论係面对同胞阿古路定波斯尼亚国脚迪斯高，一样好似稻草人咁，畀人话过就过、甩甩漏漏，完全畀唔到人信心。其实高洛仙尼季前已经喺不同场合讲过想返阿根廷落班，但纽卡素高层坚决挽留佢，正所谓「留得住个人，留唔住个心」，又点会有好表现呢?

　　韦斯咸两老首战劲抢镜

　　有朋友又会拗纽卡素係作客先咁衰啫，今铺主场出击会好啲啩，咁谂法就错喇!事关「喜鹊」主场演出一样靠唔住，好似上季咁，佢哋19次喺地头出击仅录得9胜，一半胜率都无，咁都仲学人让韦斯咸平半?制唔过囉。

　　咪忘记韦斯咸首战喺主场以2:0轻取卡迪夫城，两名老将祖高尔同路兰更相当Sharp醒，食住个势造访纽卡素，莫讲话保住不败开下盘，甚至赢埋都唔奇，唔知大家又点睇呢?